مش عارف أبدأ منين عشان زمان وايلد بيرد قالت
ياريتني ما بعت التاج ده للشخص الكسلان ده
بس قبل ما حد فيكم يقولها -- مع إني عارف انكوا مش هتقولوا عليا كده--
اعرفوا بس ان الجهاز الله يسامحه جاب لي خلاص جنان رسمي
واحتمال أبقي حاله في قسم النفسيه والعصبيه لزمايلي
بدل ما يتعبوا في البحث عن حالات
بفكر جديا أكتب قصيدة هجاء في الجهاز عشان تبقي تاني قصيده ليا في الهجاء
بلاش أكلمكو عن الأولي ... كان هزار جميل
بصوا بقه انتو لازم تستحملوني لأني لو اتكلمت صعب اني اسكت
نييجي بقه للتاج
اسم مدونتك؟
قصائد مبعثره
بدمع العين أكتبها
لماذا اخترته... ومانيتك وراء اختياره؟
اخترته ببساطه لأني أكتب ما يدعونه الناس شعرا
ومبعثره بقه لأني بكتب كل فين وفين
وفي حاجات ملهاش علاقه ببعض من الأساس
وأتبعتها بجمله بحبها لأنها وصف حي وواقعي لحالتي وأنا أكتب
فكثيرا ما أبكي وأنا أحاول الوصول لمعني حزين
وأبكي أيضا عندما أقرأ كلمات فيها من العذوبه والشجن والاحساس
أخر مره كانت في الإسكندريه أمام البحر مباشرة
أجلس وحيدا علي إحدي الصخور الكبيره
محاولا التغني بقصيده بقالي كتير فيها ونفسي أكملها
ادعوا لي
صورتك فى المدونة ورمزيتها؟
مفيش صوره
أما رمزيتها فعدم وجود الصوره جيد من وجهة نظري
لأن كل واحد منا كلماته تعبر عنه وتصفه لقارئه
والقارئ حر في رسم الصوره التي يشاؤها
هل فكر ت فى اغلاق مدونتك والسبب؟
أنا مفكرتش بس عاوز اقفلها بسبب جهازي المتعب ودراستي المرهقه
حد قل ادبه فى التعليق..اية رد فعلك؟
هو محدش قل أدبه بس لو حد ناوي يعملها
وهيشوفني علي حقيقتي
هادي في وقت نرفزة الأخرين ودي صفة اكتسبتها حديثا
أما في ثورتي .. فلو جابوا مين مش هيقدر عليا
اسوأ مدونة؟
لست أتذكر مسماها ولكني أتذكر عن ماذا كانت
وبصراحه بزعل جدا أما أعرف أن فيه ناس كده علي أرض مصر
أنا مش عاوز اخوض في غرض المدونه إلا أنها ببساطه تهاجم الإسلام
هايحصل اية للايميل لما تموت؟
الله أعلم
هبقي أديه لأي حد يمكن ينفعه
مش دي تبقي صدقه جاريه برضه (:
اديت الباسورد لحد قبل كده؟
كتيييييييير عارفينه من اصحابي
أصله بقه يا جماعه رقم التليفون القديم بتاع واحد صاحبي
اسمك؟
متهيألي سؤال غريب ... كلكم عارفينه
لكن اللي متعرفوهوش بقه
اني كنت عاوز يبقي اسمي مصطفي
علي فكره ده تاج بوجهه لكل اللي هيقرا البوست ده هل انت كنت عاوز اسمك يكون غير اسمك ولا لأ
بس مش معني كده ان واحد اسمه حسونه الأحول يقول لي كنت عاوز أبقي مسعد الأحول
لأ انا بتكلم في الأسامي العاديه أحمد ومصطفي ومحمد ... كده يعني
عمرك؟
كمان شهرين هبقي 22
برجك؟
أنا لا أقرأ أي شيء عنها ولا أريد أن أعرف ولكن عموما هو القوس
مجال دراستك؟
ط ط ط ط ط
طالب - طب - طنطا - طافح الكوته - طالع عينه
السفر بالنسبة لى؟
أعشقه
بعيدا عن ان له سبع فوايد ولا تسعه حتي
- لما أسافر بعيد وأزور حد قريبي باحس باحساس غريب
باحس بقيمة صلة الرحم فعلا
- لما أنزل اسكندريه وأتمشي علي الكورنيش
من غير ما يكون هناك ناس بتصيف ولا زحمة
فرق كبير لما تكون انت والبحر والموج والرمل والهوا والغروب لوحدكم
- كل ده كوم والرحله من المحله إلي طنطا كل يوم كوم تاني
أنا والطريق والقلم والكشكول والسرحان في اللا موجود وتوارد الأفكار
والجميل في الأخر بقه
اني بطلع بالكشكول مليان كتابه ولكن لا تكتمل أبدا
المود بتاعك؟
مش هقول متغير ولا متقلب هو أبسط من كده بكتير
عااااااااصف
وقت فراغك بتعمل فيه اية؟
قراية قصيده حلوه
وممكن خروج وممكن بقه اللي هو أحلي من الكل ..
الجلوس في غرفتي مظلمه وأسمع حاجه بحبها
وأسرح لوحدي من غير ما حد يقاطعني
ولكن علي طول بينادوا لي
الاكلة المفضلة؟
الحمد لله أنا غير مرهق في الأكل لأني باحب كل حاجه علي حد سواء
لكن بقه هقول لكم الأكلات غير المفضله
- الوز ثم الوز ثم الوز ... مش هاكله تاني أبدا
الصفات اللى اخدتها من بابا؟
قليله
الصفات اللى اخدتها من ماما؟
أخدت من ماما وأخوالي الكثير
ولذلك المفروض ألا أتعامل مع أي منهم لأنها لازم تنتهي بخناقه
وبالفعل كثيرا ما تحدث
اكتر ست حاجات بكرهها؟
السلبيه
الخيانه
الخداع
التخبط في الرأي والموقف
ووقفة الفرن مع اني لم أعد أقفها
وأخيرا ..... الوز
لماذا دخلت عالم التدوين من الاساس؟
عرفت بلوجر من مدونة كاسبر ومدونة رنا دغيدي
وأحببت أن أجمع شتات كلماتي في مكان
ولكن للأسف رفضت كلماتي الانصياع لرغبتي
أحلى جملة قيلت فى وصف مدونتك؟
الحمد لله محدش قال عليها وحشه
لكن بيني وبينكم أنا بقول علي مدونتي وحشه
التعليقات بالنسبة لك أهميتها؟
بتحسسني اني لسه عايش
لأنه ما زال هناك من يقرأ الفصحي
ومازال هناك من يهتم بالشعر
أحلى بوست كتبته؟
مش هتكلم عليه كبوست هتكلم كقصيده
الأجمل فنيا... لن يغيب البدر
والأقرب إلي نفسي .... جنت نفسي
أفضل مدونة قرأتها؟
كثير جدا
وفي كل مدونه ممكن تعجبني حاجه ملقاهاش في غيرها
أفضل بوست؟
واحد لكاسبر وواحد لوايلد بيرد
الشغل بالنسبة لك؟
ياريته ييجي بسرعه عشان أنا مش طايق خنقة انك تبقي طالب
الانترنت بالنسبة لك؟
الرأي السائد انه مضيعه للوقت
ولكني اراه وسيله جيده للحوار وبناء الفكر
والاطلاع والتزود من المعرفه
خلصت التاج
ومش عارف ليه مش عاوز ابعته
ولكن أمري إلي الله
متنسوش بقه التاج اللي أنا بعته بخصوص اسمك
وهل كنت عاوزه يبقي غير اللي هو عليه؟؟
علي أمل اللقاء
12 comments:
اخيرا وصل بالسلامة
ليا تعليق اخر بس لما افوق من الاطفال
:)
اهلا بيكي وايلد بيرد
هو انتي بيمتحنوكي لوحدك؟؟
اللي اعرفه ان كل خامسه خلصوا
انا مستني تعليقك
على فكرة انا كنت يومها مخلصة امتحان الاطفال
يعنى لسه ماكنتش فوقت من الصدمة
وبعدين انا لازم اعلق على كل كلمة فى التاج
حقى انا اللى بعته
يبقى لازم ولا بد اقراه من الاول
اصل انا نساية
بس فاكرة كده كان فيه كلام عن الوز فى الموضوع
لا الوز ده بالذات اوعى تتكلم عليه نص كلمة
تيتا تزعل منك
وانا كمان
دى الوزة وهى صغننة واصفرا بتبقى تجنن
تيجى انت مش عاجبك مامتها وباباها
كان هذا تعليقى على الجزء ده
لسه ليا ردود كتير
بس ادينى وقتى
متفكرينيش
متجيبيش سيرته قدامي
هو بصراحه الوز ده عشان خاطرك وخاطر تيتا نعمل له تمثال
لكن
لما أكون شخص عادي ومش معقد في حاجه من الأكل ومعنديش حساسيه
وتلاقي بقه
ان دي الأكله الوحيده اللي بترقدني في السرير من التعب
مش عارف يمكن يكون
idiosyncracy .. or hypersensitivity
المهم أصل في النهايه الي ان البط برقبته ولا الفراخ يا سلام لكن ده لالالالالالالا
منتظر باقي التعليق
بالنسبة لكتاباتك الشعرية
مش لازم يكون لها علاقة ببعضها
التنويع مطلوب
*صورتك فى المدونة
كان فيه صورة قبل كده وانا شوفتها
;)
*كنت عاوز يبقى اسمك مصطفى؟ليه
وهارد على سؤالك بخصوص الاسم عندى
*حلوة الخمسة ط اول مرة اسمعها
*مشكلة الكتابات اللى مش بتكمل دى
*وبلاش تعليق على الوز تانى
*بس ماقولتش البوست اللى عجبك عندى اية؟
مبروووووووك على النتيجة
واستعد علشان فى تاج جاى فى الطريق
وانا مش راضية ارد عليه لغاية دلوقتى
أهلا وايلد بيرد
مبرووووووووووووك ليكي وللجميع
يعني هيا دي هدية نجاحك؟
ليه البهدله دي بس
المهم
جميله تعليقاتك بس
الصوره يا دوبك حطيتها يومين وشلتها لأن الفكره جات لي انه لازم كلماتي تعبر عني
أما مصطفي بقه.. ففي كل مرحله لي صديق اسمه مصطفي وهو بصراحه اسم حلو وناوي لو قدر لي الله واتجوزت .. ع الخمسين كده..وخلفت - عالمعاش طبعا- هابقي أسميه مصطفي
ده إذا جه ولد :)
الخمسه ط دي اختراعي وأنا بكتب البوست
أما أحلي بوست قريته عندك
(كما تنمو الازهار البرية على القمم الشامخة تتحداها
نموت انت فوق قمة آلامى لتزهر حديقة عمرى ياعمرى)
مع اني مكنتش عاوز أقول .. يعني لكل واحد رأيه وعشان متزعليش علي باقي البوستات .. مسألتيش يعني علي أحلي بوست قريته عند كاسبر؟؟
ربنا يبارك فيكي وايلد بيرد ومنتظر التج الجديد بقه بس ياريت يكون خفيف كده وحلو وميكونش فيه وز
حلو اوى التاج دة من النوع السهل الممتنع
شكرا علي كلماتك الجميله يا
10ma
(كما تنمو الازهار البرية على القمم الشامخة تتحداها
نموت انت فوق قمة آلامى لتزهر حديقة عمرى ياعمرى)
وكانت عاجباك تحدى ليك علشان اكتر من البوست نفسه
:)
دى حاجة تسعدنىلمايكون فيه بوست مميز ليك
على الاقل هيفضل مفكرك بالمدونة كلها
:)
اما البوست بتاع كاسبر فاعتقدعرفته
;)
بالظبط يا وايلد بيرد
تحدي للشخص لأجله
أنا علي طول فاكر مدونتك .. انتي بتقولي ايه
ان شاء الله أنا هعمل لينكات بس دي عايزه شوية وقت ... وبإذن الله هعملها قريب
بارك الله فيكي
التعليقات بالنسبة لك أهميتها؟
بتحسسني اني لسه عايش
لأنه ما زال هناك من يقرأ الفصحي
ومازال هناك من يهتم بالشعر
=-=-=-=-=-=-=-=-
انا عضو في منتديات كتير قوي بس نادرا ما بشارك لنفس السبب ده يا محمود
في فترة من الفترات اعتقدت ان مفهوم الشعر اصبح فيه لبس في فهمه
كل قسم ادبي ادخله الاقيه كله خواطر نثرية مفيش شعر موزون او فصيح
بصراحة حاجة تجيب اكتئاب :D
مع ان فيه خواطر نثرية جميلة قوي وابلغ من الف بيت .. لكن يبقى الشعر الموزون له موسيقى وايقاع تستمتع بها العين والاذن واللسان
حلو اللقاء يا درش :p
شكرا لكما .. تحياتي ،،
الراجل اللي اسمه سيمباوي ده يا جدعان .... معلم
متعرفش يا أحمد سعادتي اد ايه بإنك حققت لي الأمنيه الغاليه دي وغيرت اسمي :)
تعليقك على نقطة الشعر .. مماثل لرأيي وبصراحه زعلت قوي لما دخل مدونتك ولقيت كم من أروع الأشعار ولم أجد عليقات القراء عليها
هل لأن الناس لا يفهمون الشعر أو لأنه لم يعد لديهم وقت ليكتبوا تعليقا بسيطا
سعدت جدا بمرورك العطر يا أحمد
تقبل تحياتي ومودتي ... أخوك محمود
Post a Comment